Շիրակում աշխարհազորային ստորաբաժանումների հավաքագրման աշխատանքները կակտիվանան
Շիրակի մարզպետարանում, դեկտեմբերի 29-ին կայացած տարեվերջյան ամփոփ մարզային խորհրդի նիստում Շիրակի մարզպետ Տիգրան Պետրոսյանը համայնքի ղեկավարներին ներկայացրել է մարզպետի նորանշանակ տեղակալ Պողոս Աբրահամյանին, որն այսուհետև զբաղվելու է մարզում աշխարհազորի հետ կապված խնդիրներով:
Ինչպես տեղեկացնում է «Արմենպրեսը»՝ թեև նշանակումը կատարվել է նոյեմբերի 3-ին, սակայն նորանաշանակ տեղակալին մարզպետն հիմա էր ներկայացնում համայնքների ներկայացուցիչներին:
«Պաշտոնը նոր է՝ մինչև հիմա աշխարհազորը համակարգող պաշտոն չի եղել, և մենք պետք է այս աշխատանքը կատարենք ի շահ մեր պետության պաշտպանության և մեր անվտանգութայն ուժեղացման»,- նշել է նորանշանակ մարզպետի տեղակալը՝ վստահեցնելով, որ սերտ աշխատանք է լինելու բոլոր համայնքների հետ: Մարզում աշխարհազորային կորպուսի համալրումը լինելու է մարզպետարանների կողմից ՀՀ կառավարություն ներկայացրած նախագծերի հաստատումից հետո: Շիրակի մարզում աշխարհազորային ստորաբաժանումների հավաքագրման աշխատանքները կակտիվանան հունվարից:
Մարզային խորհրդի նիստի մեկնարկին բոլորը մեկ րոպե լռությամբ հարգել են հայրենիքի պաշտպանության համար իրենց կյանքը զոհած քաջորդիների հիշատակը: Այնուհետև մարզպետարանի վարչությունների ղեկավարները ներկայացրել են 2020 թվականին իրականացված աշխատանքները:
Ամփոփելով տարին՝ մարզպետ Տիգրան Պետրոսյանը նշել է, որ տարին ծանր էր, իսկ 2021-ը դժվար աշխատանքի տարի կլինի համայնքների համար:
«Պատերազմի ու համավարակի հետևանքով առաջ եկած խնդիրներն ավելի կդժվարացնեն 2021 թվականը: Մաղթում եմ, որ հաջորդ տարին լինի հաջողված աշխատանքի տարի»,- ասել է Տիգրան Պետրոսյանը՝ համայնքների ղեկավարներին հորդորելով ավելի մեծ ուշադրություն դարձնել հատկապես զոհված, անհետ կորած կամ գերեվարված անձանց ընտանիքներին: Մարզպետն առանձնահատուկ շնորհակալություն է հայտնել մարզի առողջապահության ոլորտի բոլոր աշխատակիցներին՝ համավարակի ամբողջ ընթացքում նվիրումով աշխատելու համար: Մարզպետն իր երախտիքի խոսքն է հղել հայրենիքի պաշտպաններին:
Միացեք «Հինգշաբթի» անկախ լրատվական հարթակի տելեգրամի ալիքին https://t.me/hingshabti