Հայաստանի ազգային հավաքականը ժամանել է Սեն Գալեն
Հայաստանի ազգային հավաքականն արդեն Շվեյցարիայի Սեն Գալեն քաղաքում է, որտեղ էլ կընթանա նախապատրաստությունը մարտի 25-ին կայանալիք Լիխտենշտեյն-Հայաստան հանդիպմանը, հայտնում են ՀՖՖ մամուլի ծառայությունից:
Հայաստանից ժամանած ֆուտբոլիստներին միացել են նաև արտերկրում հանդես եկող ֆուտբոլիստները: Թիմը հանգրվանել է Սեն Գալենի «Ուալհալա» հյուրանոցում: Այսօր երեկոյան հավաքականը կանցկացնի առաջին մարզումը Շվեյցարիայում՝ Սեն Գալենից 25 րոպեի հեռավորության վրա գտնվող Ուցվիլ քաղաքի մարզադաշտում:
Հավելենք, որ Հայաստանի ազգային հավաքականի կազմում Լիխտենշտեյնի հետ խաղին կպատրաստվեն 27 ֆուտբոլիստ: Էդուարդ Սպերցյանը կկարողանա միանալ թիմին միայն Լիխտենշտեյնի հետ հանդիպումից հետո: «Կրասնոդարի» 20-ամյա կիսապաշտպանը դեռևս ապաքինվում է վնասվածքից և չի կարողանա մասնակցել առաջիկա խաղին: Ֆուտբոլիստի վնասվածքից վերականգնման գործընթացը չընդհատելու համար «Կրասնոդարի» և ՀՖՖ-ի միջև ձեռք է բերվել համաձայնություն, ըստ որի Սպերցյանը բուժումը կշարունակի Կրասնոդարում: Ամենայն հավանականությամբ, Սպերցյանը կկարողանա Երևան ժամանել միայն Լիխտենշտեյնի հետ հանդիպումից հետո: Նրա մասնակցությունը Իսլանդիայի և Ռումինիայի դեմ հանդիպումներին դեռևս հարցականի տակ է:
Առողջական խնդիրների պատճառով Շվեյցարիա չի մեկնել 17-ամյա պաշտպան Էրիկ Սիմոնյանը: Շվեյցարիա մեկնող ֆուտբոլիստների ցուցակում չեն նաև ազգային հավաքականի՝ նախապես հրապարակված ընդլայնված կազմում ընդգրկված Յուրի Գարեգինյանը, Պետրոս Ավետիսյանը և Արման Հովհաննիսյանը, որոնք անհրաժեշտության դեպքում դեռ կարող են միանալ հավաքականին Երևանում՝ Լիխտենշտեյին հետ հանդիպումից հետո:
Լիխտենշտեյնի հետ հանդիպմանը Հայաստանի ազգային հավաքականի կազմում կնախապատրաստվեն հետևյալ 27 ֆուտբոլիստները.
Դարպասապահներ
- Դավիթ Յուրչենկո — «Ալաշկերտ»
- Անատոլի Այվազով — «Ուրարտու»
- Արսեն Բեգլարյան — «Ուրարտու»
Պաշտպաններ
- Հովհաննես Համբարձումյան — «Անորտոսիս» (Կիպրոս)
- Կամո Հովհաննիսյան — «Կայրաթ» (Ղազախստան)
- Վարազդատ Հարոյան — «Աստանա» (Ղազախստան)
- Անդրե Չալըշըր — «Ապոլոն Սմիրնիս» (Հունաստան)
- Տարոն Ոսկանյան — «Ալաշկերտ»
- Սերոբ Գրիգորյան — «Փյունիկ»
- Հայկ Իշխանյան — «Շիրակ»
- Ժոաո Ժորդի Մոնրոյ Արարատ — «Նոա»
- Հակոբ Հակոբյան — «Ուրարտու»
Կիսապաշտպաններ
- Էդգար Բաբայան — «Ռիգա» (Լատվիա)
- Գևորգ Ղազարյան — «Լամիա» (Հունաստան)
- Տիգրան Բարսեղյան — «Աստանա» (Ղազախստան)
- Վահան Բիչախչյան — «Ժիլինա» (Սլովակիա)
- Խորեն Բայրամյան — «Ռոստով» (Ռուսաստան)
- Սոլոմոն Իմե Ուդո — «Շախտյոր Կարագանդա» (Ղազախստան)
- Արտակ Գրիգորյան — «Ալաշկերտ»
- Վբեյմար Անգուլո — «Արարատ-Արմենիա»
- Կարեն Մուրադյան — «Արարատ»
- Արամ Քոչարյան — «Լոռի ՖԱ»
- Ժիրայր Շաղոյան — ԲԿՄԱ
Հարձակվողներ
- Սարգիս Ադամյան — «Հոֆենհայմ» (Գերմանիա)
- Նորբերտո Բրիասկո Բալեկյան — «Ուրական» (Արգենտինա)
- Ալեքսանդր Կարապետյան — «Արարատ-Արմենիա»
- Արթուր Միրանյան — «Ուրարտու»
Հիշեցնենք, որ մարտին Հայաստանի ազգային հավաքականը կանցկացնի 3 հանդիպում: Մարտի 25-ին՝ ժամը 23:45-ին (Երևանի ժամանակով)՝ Վադուցի «Ռեյնպարկ» մարզադաշտում, կկայանա Աշխարհի 2022 թ. առաջնության ընտրական փուլի J խմբի առաջին տուրի Լիխտենշտեյն-Հայաստան հանդիպումը: Մարտի 28-ին՝ ժամը 20:00-ին՝ Վազգեն Սարգսյանի անվան «Հանրապետական» մարզադաշտում, կկայանա երկրորդ տուրի Հայաստան-Իսլանդիա հանդիպումը, իսկ մարտի 31-ին՝ ժամը 20:00-ին՝ Հայաստան-Ռումինիա հանդիպումը:
Միացեք «Հինգշաբթի» անկախ լրատվական հարթակի տելեգրամի ալիքին https://t.me/hingshabti