Շիրակի մարզի ներկայացուցիչները նվաճել են 7 մեդալ

Շիրակի մարզի ներկայացուցիչները նվաճել են 7 մեդալ

Հուլիսի 25-27-ը Ծաղկաձորում կայացել է հաշմանդամություն ունեցող անձանց 18-րդ հանրապետական մարզական փառատոնը, որին մասնակցել է 120 մարզիկ:

Փառատոնը կազմակերպել է Հայաստանի ազգային պարալիմպիկ կոմիտեն ՀՀ կրթության, գիտության, մշակույթի և սպորտի նախարարության աջակցությամբ: Ծաղկաձորի մարզահամալիրում ընթացած փառատոնի մասնակիցները մրցել են լող, պաուերլիֆտինգ, բազկամարտ, սայլակներով բասկետբոլ, շախմատ, թենիս մարզաձևերում. մրցանակակիրների ցանկը:

Կազմակերպիչներից Գոհար Նավասարդյանի խոսքով՝ միջոցառման գլխավոր նպատակը հաշմանդամային սպորտի զարգացմանը և մասսայականացմանը նպաստելն է, ինչպես նաև հաշմանդամություն ունեցող անձանց խնդիրների մասին մեկ անգամ ևս բարձրաձայնելը. «Շատերը փառատոնի միջոցով տեղեկանում են, որ կան հաշմանդամային սպորտաձևեր: Հաշմանդամություն ունեցող անձինք, մասնակցելով այս մրցումներին, հաղթահարում են տարատեսակ բարդույթներ և դժվարություններ: Շատերն էլ մրցումներից հետո որոշում են զբաղվել պրոֆեսիոնալ սպորտով: Այսպիսով՝ մենք սպորտի միջոցով հաշմանդամություն ունեցող անձանց ներգրավում ենք հասարակություն»:

Հիշեցնենք, որ 2021 թվականի ՀՀ պետական բյուջեով հաշմանդամային (ադապտիվ) սպորտին հատկացվող պետական աջակցության գումարը և շահառու կազմակերպությունների թիվն ավելացել է: Մինչև 2020 թվականը ներառյալ պետական աջակցություն է տրամադրվել հաշմանդամային սպորտի զարգացման խնդիրներով զբաղվող 4 կազմակերպության («Հայաստանի ազգային պարալիմպիկ կոմիտե», «Խուլերի հայկական սպորտային կոմիտե», «Հայաստանի կույրերի միավորում», «Հայկական հատուկ օլիմպիադաներ»), իսկ այս տարի աջակցություն են ստանում նաև Հայաստանի անվասայլակով բասկետբոլի, Հաշմանդամ անձանց սեղանի թենիսի հայկական և Հաշմանդամային սպորտի ֆեդերացիաները:

Շիրակի մարզի ներկայացուցիչները նվաճեցին 4՝ ոսկե, 1՝ արծաթե և 2 բրոնզե մեդալներ։ Մարզական փառատոնի հաղթողներ դարձան Գայանե Մովսիսյանը (ծանրամարտ և բազկամարտ), Արա Մարտիրոսյանը (ծանրամարտ) և Արմինե Նիկողոսյանը (սեղանի թենիս)։ Մրցումներում հանդես եկան նաև անվասայլակներով բասկետբոլի «ԲՄԱ- Գյումրի» նորաստեղծ ակումբի անդամները:

wp-apeth