Հիշատակի հուշատախտակը կտեղադրվի Ազատամարտիկների պուրակում
«Ճարտարապետ ենք հրավիրել, Ստեփանակերտի քաղաքապետարանի աշխատակիցների և զոհված զինծառայողների ծնողների ներկայությամբ տեղանքը ուսումնասիրվել է, և եկել ենք այն եզրակացության, որ այնտեղ հնարավոր է տեղադրել և ներկա դրությամբ իրականացվում է լուսանկարների հավաքագրում»,- «Արցախպրեսի» թղթակցի հետ զրույցում նշել է ՀԿ նախագահ Արմեն Ասրյանը:
Նրա հավաստմամբ՝ չեն հապաղելու, գործընթացը սկսելու են, լուսանկարների առաջին խմբաքանակը լրանալուն պես՝ փոխանցելու են Ստեփանակերտի քաղաքապետարանին:
«Հուսով ենք, որ կարճ ժամանակում մեզ հաջողվելու է մեր բոլոր հերոսների լուսանկարներն ունենալ և նրանց անվանն ու գործին արժանի հուշատախտակ տեղադրել։ Պուրակն էլ հենց Ազատամարտիկների անունն է կրում»,- առանձնանշել է ՀԿ նախագահ Արմեն Ասրյանը: Նա նշել է նաև, որ զոհված զինծառայողների ծնողների հետ միասին են քննարկել, և բոլորն էլ այն կարծիքին էին, որ լուսանկարներն այդտեղից պետք է տեղափոխել և թարմացնել:
Զոհված զինծառայողի մայր Անժելա Ասրյանը ողջունում է ղեկավարության որոշումը: «Ուզում եմ խաղաղություն լինի, որպեսզի պահպանվեն մեր զավակների հիշատակին կանգնեցված բոլոր հուշակոթողները։ Որտեղ որդիս արյուն է թափել, զուլալ աղբյուր պետք է լինի, երազում եմ հուշաքար պատրաստել:
Շուշիում է զոհվել որդիս՝ Սասունը: 26 տարի ապրել ենք այնտեղ, սիրտս ցավում է Շուշիի համար»,- մեզ հետ զրույցում անկեղծացել է զոհված զինծառայողի մայը:
