Հովհաննես Հարությունյանը Գյումրիում իշխող ուժի անհաջողությունը կապում է ընտրություններին մարդկանց ցածր մասնակցության հետ
Շիրակի մարզպետ, Գյումրիում հոկտեմբերի 17-ին կայացած ՏԻՄ ընտրություններում «Քաղաքացիական պայմանագիր» կուսակցության ցուցակի առաջին համար Հովհաննես Հարությունյանը մեկնաբանել է ընտրություններում իշխող ուժի գրանցած անհաջող արդյունքը: Հայ-ռուսական միջտարածաշրջանային համաժողովի շրջանակներում լրագրողների հետ զրույցում Հարությունյանը կարծիք հայտնեց, որ ընտրություններում իրենց անհաջողության հիմնական պատճառը ընտրություններին մարկանց ցածր մասնակցությունն է:
«Մենք բոլորս այս պահին փորձում ենք գնահատել, թե ինչու այդպիսի ցածր մասնակցություն եղավ և հասկանանք, թե որն էր պատճառը: Ես կարծում եմ, որ ցածր մասնակցությունն էր ամենակարևոր պատճառը և հիմա փորձում ենք տարբեր քաղտեխնոլոգների հետ հասկանալ, թե ինչումն էր խնդիրը»,- «Արմենպրես»-ի փոխանցմամբ՝ նշել է Հարությունյանը:
Հարցին՝ հնարավոր չէ՞, որ առաջադրված ուժերի նկատմամբ քաղաքացիները վստահություն չունեին, Հարությունյանը պատասխանեց. « Ես կհամաձայնվեի ձեզ հետ, եթե մենք ունենայինք բավականաչափ մասնակցություն և քիչ վստահության քվե»:
Անդրադառնալով ընտրությունների արդյունքներով Գյումրիի ավագանի անցած ուժերի հետ կոալիցիա կազմելու մասին հարցին՝ Հարությունյանն ընդգծեց, որ այս պահին բոլոր սպասում են ընտրությունների վերջնական արդյունքների հրապարակմանը: «Դրանից հետո, եթե լինի նման բան, կտեղեկացնենք»:
Հովհաննես Հարությունյանը խոսեց նաև մարզպետի պաշտոնից ազատվելու հավանականության մասին հարցին. «Այս պահին ես շարունակում եմ պաշտոնավարել, նման հարց չի քննարկվել»,- ասաց մարզպետը:
Գյումրիում հոկտեմբերի 17-ին կայացած ՏԻՄ ընտրությունների արդյունքներով իշխող «Քաղաքացիական պայմանագիր» կուսակցությունը զիջել է «Բալասանյան» դաշինքին: Նախնական արդյունքներով «Քաղաքացիական պայմանագիր կուսակցությունը ստացել է 7785 ձայն, իսկ «Բալասանյան» դաշինքը՝ 9637 ձայն: Գյումրիում ընտրելու իրավունք ունեցող 109․453 քաղաքացիներից քվեարկությանը մասնակցել է 26․417-ը կամ ընտրելու իրավունք ունեցողների 24․14%-ը։
